- pinoytimes.ca - http://pinoytimes.ca -

“PRESIDENT CORY – Larawan ng Katatagan”

Posted By aldrin On August 15, 2009 @ 2:27 pm In Maikling Kwento | 4 Comments

“PRESIDENT CORY – Larawan ng Katatagan”

Buong Pilipinas nagulantang, ng magbukang liwayway,
Araw ng Sabado, August one two thousand nine;
Malungkot na balita, tunay na nakagimbal,
Pangulong Corazon Aquino, tuluyan ng lumisan.

Isa ka ring bayani, tulad ng ‘yong kabiyak,
Nakitlan ng buhay, pagdating sa tarmac;
Inaasahang sasagip, sa bansang nasasadlak,
Nagdurusang Pilipinas, walang lubay sa pag-iyak.

Lakas mo’y di nagmaliw, lalo ka pang tumibay,
Isang katangiang, hindi lahat ay may taglay;
Buong tapang mong hinarap, mga kumakalaban,
Mga prinsipyo ni Ninoy, binigyan mo ng buhay.

Wala ng hihigit pa, sa kasaysayan ng mga Pinoy,
Nang magkaron ng People Power, sa mga Marcos nagtaboy;
Pagdanak ng dugo naiwasan, maraming napahagulgol,
Hindi makapaniwalang, may naganap na rebolusyon.

Subali’t hindi, ganoon kadali,
Maglinis ng lipunan, magtuwid ng mali;
Mga ahas naglipana, lihim na katunggali,
Mahirap isakatuparan, layuning minimithi.

Ngunit ang mahalaga, ay nasimulan mo,
Maayos na patakbo, sa masalimuot na gobyerno;
Tatag ng loob, kahit babae ka’y pinakita mo,
Hinangaan ka ng mundo, mga Pinoy nakapag taas-noo.

Katangi-tangi kang naglingkod, isa kang huwaran,
Dalisay na serbisyo, walang bahid ng pagkagahaman;
MakaDiyos, makatao, masunuring mamamayan,
Magising nawa ang iba dyan, ikaw sana’y tularan.

Dahil sa katapatan, ng ‘yong panunungkulan,
Buong angkan mo’y, kaya kang ipagyabang;
Mula sa ninuno, hanggang kaapu-apuhan,
Buong pagmamalaking, tataglayin ang ‘yong pangalan.

Ngayong ikaw nga, sa mundo’y nagpa alam,
Maaliwalas nawa, ang ‘yong paglalakbay;
Maluwalhating makarating, sa kaharian ng Maykapal,
Makakapiling na rin, ang asawang minamahal.

Patuloy kang mabubuhay, sa aming ala-ala,
Magsisilbing inspirasyon, igagalang tuwina;
Sa bansang Pilipinas, naibalik mo ang demokrasya,
Sambit ng mga Pinoy, karangalang naging kalahi ka.
BY: LOLA PANCHANG


Article printed from pinoytimes.ca: http://pinoytimes.ca

URL to article: http://pinoytimes.ca/2009/08/short-stories/president-cory-larawan-ng-katatagan/

Copyright © 2009 pinoytimes.ca. All rights reserved.